.

home


إتغيرى وغيرى حياتهم

إتغيرى وغيرى حياتهم

إتغيرى وغيرى حياتهم

إتغيرى وغيرى حياتهم

إحنا الستات التعبانين الشقيانين اللي شايلين الحمل كله..

إحنا الستات اللي من غيرنا الدنيا تقف ويحتاسوا من غيرنا..

إحنا اللي بنغير كل اللي حوالينا ومابنتغيرش..

وعلشان مابنتغيرش الملل بيعرف إزاي يلاقي الباب اللي يدخل منه ويفضل يتسرسب واحدة واحدة..

 وساعتها تبقى شكوتنا الوحيدة…أنا زهقااااااااااااااااانة…

علشان كده ومن خلال تجاربي وتجارب صديقاتي ومعارفي فكرت في كام طريقة أقدر أهدم بها جزء من حائط الملل اللي واقف بيننا  وبين سعادتنا :

1- كونى متأكدة إن التغيير مصدره من جواكي، مفيش حد هيساعدك غير نفسك علشان يمكن تغيرك مايعجبش حد حتى لو هتتغيري علشانهم، خليكي أنانية شوية وفكري في نفسك.

2- حاولي طول الوقت تبقي مبسوطة، أول خطوات التغير هي إنك تسيطري على إنفعالاتك يعني مثلًا لو عصبية حاولي تكوني هادية شوية، العصبية عمرها ما حلت مشكلة لكن ممكن تضيعي حقك و تطلعي بسببها غلطانة في الآخر كمان .. شوفتي إحنا غلابة إزاي؟

3- القراءة مهمة جدًا، حاولي تلاقي لنفسك وقت تقرأي أي حاجة بس لو هتقرأي قبل ما تنامي اختاري كتاب  كوميدي أو فيه خيال،لأن القراءة هتفتح لك دنيا جديدة من الخيال ، وتساعدك أنك تنفصلي عن مشاكل يومك وتفكري في اللي كنتي بتقرأيه لغاية ما تنامي.

4- جربي تغيري شكلك..لا مش عمليات تجميل ماتخافيش، يعني لو وزنك زاد من الجواز ومشتقاته؛ هاتي بلوزة بتحبيها مش عارفة تلبسيها بعد ماتخنتي و حطيها هدف قصادك و طول ما انتي مش عارفة تلبسيها هتفضلي تحاولي لغاية ما توصلي لوزنك المثالي وساعتها هتبقي مبسوطة.

5- مفيش مشكلة لو جربتي تقصي شعرك أو تصبغيه ماتستنيش لما حد يقولك عندك شعراية بيضا، هتزعلي منه خصوصًا لو جوزك،  روحي قصي شعرك وغيري لونه،  وإعمليها له مفاجأة حتى لو مابيحبش المفاجآت.

6- جربي تغيري حاجة في نظام بيتك .. حتى لو حاجة بسيطة، ممكن تبدلي أماكن البراويز أو حتى تبدلي أماكن الكراسي.

7- حاولي تخرجي بره إطار المحشي والملوخية والمكرونة بالبشاميل، فعلًا مش هما دول أفضل حاجة ممكن ناكلها، ممكن تجربي أكلات جديدة من بلاد كتير، أكيد قنوات الطبخ قايمة بالواجب هنا.

8- أهم حاجة بلاش كلمة “فلانة جربت و ماعجبهاش” بلاش تعيشي حياتك على تجارب غيرك جربي كل حاجة جديدة وماتخافيش، ذوقك مختلف و ممكن يبقى أحلى.. و صدقيني التجربة مش هتأذيكي.

إنتي مصدر سعادة اللي حواليكي بس علشان ينبسطوا لازم إنتي تنبسطي الأول .

وبذلك نكون قدمنا مقال عن إتغيرى وغيرى حياتهم ، ويمكنك متابعة خطوات تساعدك علي الراحة من هذا الرابط .




التعليق عبر الفيس بوك
الكلمات الدليلية :

تعليق واحد

  • Shima Fawzy

    بتاريخ 06/07/2015 - 6:00 ص

    تحفه انتي فريده

اكتب تعليق