يوميات حنفي وفوزية 7

يوميات حنفي وفوزية 7

” بعد تلات سنين من الجواز ، مخرجش فيها الحب ابدا من الشباك ، لكن اتحول لحاجة تانية مختلفة ، أوقات أعرج ، وساعات أطرش ، وكتير أعمي ، ودة في عرف العلاقة الزوجية بين اي اتنين مصريين اصيلين عادي .ولان حنفي وفوزية حبهم مش عادي ، فقرروا الاحتفاظ بمشاعرهم الفياظة ، بنكهة خاصة ، وجابوا عصفورين وسموهم علي اسمهم ، ومعاهم هنعيش كل يوم حكاية مطرقعة “

يوميات حنفي وفوزية 7
يوميات حنفي وفوزية 7

كلب يعني دوج

وبعد يوم طويل من القعدة لوحدها والملل والزهق ، خلصت كل الكلام في التليفون مع صحباتها ، رزلت علي كل اللي تعرفهم علي الفيس بوك ، مش لاقية حاجة تعملها ، قعدت مستنية حنفي علشان يشوف لها حل في الفراغ اللي هي فيه وخصوصا ان تاني يوم اجازته من الشغل ..
صوت المفاتيح في الباب كان كفيل ان فوزية تبتسم وأول مدخل جوزها استقبلته بفرح.
ازيك يا حبيبي؟
الحمد لله ..خير يا حبيبتي اللهم اجعله خير .
هو ايه دة ؟
لا اصلك بتضحكي في وشي .يعني مفيش زوابع ولا براكين بتنفجر علشان الانبوبة والا الرجل بتاع فاتورة الكهربا ولا قطة الجيران .
لا يا حبيبي مفيش حاجة خالص خالص.. تتعشي ؟
كمان ..استرها يا رب .
وعلي السفرة كانت مش عارفة تفتح الموضوع ازاي ؟
فوزية ..فيه حاجة حصلت ؟ حاسس كدة انك عاوزة تقولي حاجة .
حبيبي اصل انا زهقانة وملانة وحابة حاجة تشغل وقتي ؟
مانا قلت لك معنديش مشكلة في الشغل انتي اللي مش حابة تدوري علي حاجة مناسبة .
لا شغل ايه ؟ مش دة تفكيري خالص ؟ تاكل فاكهة ؟
استني بس ..بتفكري في ايه طيب ؟ حابة تاخدي كورس مثلا
لا لا ابدا .
انا بفكر اربي كلب ..اشتري لي كلب يا حنفييييي .
كلب؟؟؟ دة انتي بتترعبي من قطة الجيران ؟؟
لا يا حبيبي خالص دة انا حبيت الموضوع خالص
واشمعني كلب يعني مش قطة ؟
مش فارقة يا حبيبي .المهم حاجة تشغلني والمهم المبدأ انت موافق عليه ؟
يعني لو اشتريت لك كلب هتبطلي تزني وتقولي الفراغ والملل ؟
اكيد يا حبيبي .
خلاص وانت بتعرفي في الكلاب ..يعني هتعرفي تربيه ؟
ودي حاجة صعبة يعني .هياكل من اكلنا ويشرب ميا وخلاص هي شغلانة .
هو ايه دة ؟ انت فاكرة الكلب دة ايه ؟ كتاكيت هتحوطيهم في البلكونة وترميلهم شوية اكل واخر اليوم تغطيهم .
قال كلب قال ..وانا اقول فوزية اكيد قرت في الموضوع وحد مشجعها اتاريكي مش فاهمة حاجة .
ايه بس هو انا كل ماقولك فكرة تتريق عليا كدة ..انت لا تطاق ..عادي يعني كلب في سلسلة وياكل ويشرب وينام وخلاص هو فيزيا .
لا يا حبيبتي .مش فيزيا ..وناوية تشتريه امتي .
قصدك تشتريهولي امتي ؟
حاااااااااضر بكرة الصبح ان شاء الله .
طول الليل فوزية قلقانة مبتنامش وبتحلم بالكوابيس .
تاني يوم الصبح بعد الفطار حنفي بيسألها تحبي ننزل دلوقتي نشوف كلب ؟
لالالالا كلب ايه ..خلاص انا طول اليل بسمع صوت هوهوة جامدة وكلاب بتتخانق و قلقاني من النوم وطول الليل بحلم بالكوابيس .
يعني خلاص مش عايزة كلب .
لا خلاص مش عايزة .
في سره يقول الحمدللللللللله
بس ممكن نشتري قطة .
من صدمته مقدرش يرد ..بس قرر بينه وبين نفسه يستخدم نفس السلاح اللي خلاها تكره الكلاب وبضحكة شريرة قال اغير نغمة المنبه لقطط بتعيط وبتتخانق ..وراكي يا فوزية قال قطط وكلاب قال .
بتقول حاجة يا حنفي .
لا يا حبيبتي بفكر اريحك اناهردة من الاكل ونجيب دليفري قالها كدة وهو بيدور ع النت علي اصوات للقطط .
تمت

لقراءة يوميات حنفي وفوزية اعتبرني خطيبتك يا اخي من هذا الرابط .

 

Post Author: إيمان عبد الرحمن

خريجة كلية الأداب/ قسم الإعلام - جامعة عين شمس صحفية بمجلة حواء

اترك تعليقاً

لن يتم نشر عنوان بريدك الإلكتروني.