.

home


كيف تعرفين أنك مصابة بالحسد ؟

كيف تعرفين أنك مصابة بالحسد ؟

كيف تعرفين أنك مصابة بالحسد ؟

كيف تعرفين أنك مصابة بالحسد ؟

شدك العنوان  … صح؟

متأكدة إنك محسودة وكل الناس عينيهم مفنجلة وهتطلع على اللي معاكي، ودايمًا خايفة أحسن حد من الناس الوحشين الحسودين يعرف أخبارك، ويمكن يكون عندك خرزة زرقاء أو حجاب وكل ماحد يشوفك ويسلم عليكي تقرئي في سرك المعوذتين،  ومش بعيد تكوني روحتي لأحد المشايخ علشان يحصنك إنتي وولادك من الحسد .

بس تعالي هنا لما أسألك..إشمعنى إنتي اللي دايمًا شايفة إنك محط أنظار البشرية وخايفة يشوفوا إنجازاتك علشان هيحسدوكي؟

الموضوع بقى عندك فوبيا وبقى فيه طرق كتير تخليكي تحاولي كإنسانة مسكينة بتتعرض للحسد من كل كائنات الأرض إنها تفكر تحصن نفسها.

مرة بالقرآن ومرة بالإحتجاب عن الناس ومرة بإنك تخفي كل أخبارك عن اللي حواليكي علشان محدش يوقف لك المراكب السايرة بعينه المدورة.

بس فيه طريقة متبعة تكاد تكون مستخدمة لكل الناس اللي بتعتقد إنها بتتحسد طول الوقت و تتجلى الطريقة دي لو تقابل إتنين بيتبعوا نفس الطريقة ولهم نفس الفكر.

طريقة الشكوى..رقوة :

وهي طريقة مشهورة بتواجهي بيها أي شخص يقابلك ويسألك عن أخبارك بكمية شكاوى من صحتك ومن عيالك المرضانين العيانين اللي مطلعين عينك وجوزك البخيل اللي مش بيرضى يوديكي الجونة في الشتا ومن شغلك اللي قرفتي منه وبتفكري تسيبيه علشان خلاص تعبتي، ومن عربيتك اللي كل شوية عند الميكانيكي، وحياتك اللي كلها بؤس وشقاء.

وبعد ماتخلصي سرد نشرة أخبار الكآبة قصاد الشخص اللي بيلعن نفسه لحظة ماسألك وكان بيسمعك بتأثر وبيمصمص شفايفه على حالك البائس، وغالبًا بيكون فاهم كويس إنك تمام وزي الفل بس بتخزي العين.

تبدئي تردي السؤال وتسأليه عن أخباره..

وتيجي الإجابة منه عبارة عن وصلة بؤس جديدة مع شوية صعبانيات ودمعتين مزيفين منك على كلمتين بتسمعيهم وإنتي واثقة إنهم كذب.

ماهو على رأي فريد شوقي لما قالها لزكي رستم في فيلم رصيف نمرة خمسة..”عملتها قبلك”.

بس لما تيجي تتبعي طريقة الشكوى رقوة لازم تبقي عارفة اللي جاي:

-حاولي تميزي الناس اللي تخزي عينيهم عنك..يعني خليكي فاهمة إن مش كل الناس حسودة.

-إعرفي إن القرد في عين أمه غزال، يعني مفيش واحدة هتحسد ولادك لأن عمرها ماهتشوف ولادك أحسن منهم أو أحلى منهم، ولادها بالنسبة لها لولي معقود في خيط.

-الحسد مذكور في القرآن، بس مش معنى كده إننا نبقى عالم مهاويس خايفين نشتغل وخايفين نتجوز وخايفين نشتري بيوت وننجح في حياتنا.

-الطريقة دي سخيفة ومكشوفة جدًا فطول الوقت بتبقي باينة إنك ست كذابة و إن حد صدقك بياخد عنك فكرة إنك فاشلة؛ فاشلة تربي ولادك وفاشلة تعيشي وفاشلة تحافظي على صحتك.

-خليكي عارفة إن الحسد بييجي من عدم الرضا يعني المتجوزة مش هتحسدك على شغلك علشان عندها أولاد بالدنيا، واللي مش متجوزة برضه عندها شغلها وأهلها وأصحابها اللي أحسن من الحياة مع رجل هي ممكن تكون شايفة إنه هيتحكم فيها وعاوزة تكون حرة، عربيتك أو شقتك الجديدة مش أملة ممكن أي حد يجيب زيهم ويبقى شايفك بتحسديه ساعتها.

-ثقافة الحسد منتشرة بقوة في العالم العربي..فكري تسافري برة ومش هتلاقي الكلام ده وهتبقي في مأساة حقيقية لأنك فقدتي ممارسة سلوك لعين إسمه خزي العين.

-لازم تبقي عارفة إن العالم مش هيسيب أغنى أغنياء العالم وأنجح شخصياته ويحسدوكي علشان جبتي شنطة كحلي لميع أو إبنك طلع الأول على الفصل في الحضانة أو علشان بنتك شعرها بني فاتح.

لمتابعة مقال اتغيري وغيري حياتهم اضغطي الرابط




التعليق عبر الفيس بوك

لا توجد تعليقات

اكتب تعليق