.

home


طاجن الكوارع بالخضار

طاجن الكوارع بالخضار :

طاجن كوارع بالخضار ؟!!
أيه ليه لأ …. أساس الأكلة دي الخُضار …ثانياّ  الكوارع… بس الخضار ده مش معناه إن الطاجن تورلي لا خالص ….

القصد هنا إنك تاخدى طعم الخضار في الطاجن عشان كده حنجيب كوساية، بطاطساية، جزراية، شويه بسلة ، على شوية  فاصوليا خضرا….كل الكلام ده يتقطع صغير جداّ جداّ ..كمان جداً

نجيب  بقه بصلتين نفرمهم  ونحطهم في حلة متوسطة  مع شوية زيت وعلى النار ..لما يبدأ لون البصل يتغير ، نحط عليهم فصين توم مفرومين ونقلب تاني  شوية …. وبعدين نبدأ نحط الخضار  نوع  نوع ,, بترتيب السوا .. يعني الجزر بعدين البسلة  بعدين الفاصوليا  بعدين  البطاطس  وفي الاّخر الكوسة ونقعد نقلب شوية ونحط التوابل  بقة ..  ملح  م فلفل إسود / سِنه كمون / شويه قرفة ناعمة /على حبة بهار لحم صغيرين أوي

الشكل العام دلوقتي  كالأتي :  المفروض الخضار مش باين  ومش عارفين نحدد ملامح فين الكوسة ولا فين البطاطس أو فين حتى الفاصوليا وغيرهم من باقي الخضار اللي إستخدمناه ..لأننا إتفقنا من الأول انه مش تورلي وهو ده أساس الطاجن إننا ناخد ميكس طعم الخضار مش إننا نلاقي خضار ناكله ….وحتكون الخلطة دي ناشفة شوية ومتحمرة كده

نيجي بقه لكبير الأكلة الكوارع  …. نجيب نص كارع مسلوق…وبالبحث عن أصل كلمة كارع  لقينا إنها من مقطعين ( كا  ــ  رع  )  إله الزفلطة عن قدماء المصريين !! 

 ونبدأ نخلي نص الكارع ده  من العضم خالص  يعني تبقى الكوارع قطع وما يمنعش نفضي شويه نخاااااع ….. وكده بقى عندنا  كوارع  فيليه ..(حلوة كوارع فيليه دي سمعتوها قبل كده )

نحط الكوارع الفيليه  دي على خلطة البصل والخضار مع سِنة زيت و نقلب  و نقلب على طول.. بعد كده نحط معلقتين صلصة كبار ونكمل تقليب ,,,ونذود كوبايتين عصير طماطم  ونكمل تقليب   ونسيبهم على النار شوية ( عشان تتسبك )  …  بعد كده نحط كوبايتين شورع ..  و (الشورع) ده  هو شوربة كوارع

نسيب الكلام ده  كله على النار شوية وبعد أول غلوة نهدّي النار خالص وبعد شوية  نحط الكلام ده كله في الطاجن وندخّله الفرن.. وبعد ما الطاجن ياخد ويدي مع نفسه في الفرن والوش بتاعه ياخد سنه تحمير ، يبقى انتِ كده في التمام .

 دلوقتي النتيجة هتكون طاجن سُخن نار وشه متحمر وانت بتاكل هتلاقي قطع كوارع متحمرة بتاتش صلصة وواخدة طعم ميكس خضار معاها ، وفي نفس الوقت انت هتحس بطعم ميكس الخضار ده في وسط الأكل لأن الخضار داب مع البصل مع التوم مع شوية النخاع مع فتافتيت الكوارع وكل ده سااااح مع الشوربة …

الصراحة البقاء لله … أو بالهنا والشفا زى ما أنتم شايفين .

 

 




التعليق عبر الفيس بوك

تعليق واحد

  • هبه عثمان

    بتاريخ 30/05/2017 - 5:13 م

    الإبداع لا حدود له ، ولا تصنيف ولا ……… (حط أي مسمى) ، ذكرني مقالك عن الأكل بأول مقال قرأته لك عن وصف مدينة اسبانية (انا وزاراجوزا ) لاني حسيت اني باشوف المكان كما لو أني هناك ،،،،الفكرة هنا مش الطبيخ لا انت قدرت للحظة تخليني حاسة اني واقفة في المطبخ ،،،،ولحظة أخرى اني اتذوق الأكلة مع اني (فرفورة) ماليش في الكوارع، ،، الوصف الدقيق للوضع المقادير والإحساس العميق بالطعم، ،،،،،
    فعلا أن تدرك الإبداع وتحس به ، يجعل طعم الأشياء يختلف
    ربنا يبارك لنا في ابداعك يا فنان

اكتب تعليق