.

home


كوسة مقلية محشية طحينة

كوسة مقلية محشية طحينة :

كوسة مقلية محشية طحينة أكلة اختلفوا عليها ، ناس قالت دي فارسية ، ومنهم قال شامية  ، المهم أننا  هناكلها  وهنبقى مية مية ..

الكوسة ..ياسلام على الكوسة ..

مين فينا مابيحبش الكوسة !!

ماعلينا … خلينا في الكوسة اللي هنا ، الموضوع هنا هيتعمل في صينية ، ما تقفلوش دماغكم وتسألوا صينية مستطيلة ولا مدوّرة ( إحنا مش بنعمل رقاق عشان شكل الصينية يفرق معانا ) ، هنجيب كمية من الكوسة حجمها متوسط جميل كدة ونبدأ ننضفها ونقشرها ونقورها ، ونجيب طاسة واسعة شوية ونحط فيها شوية زيت على (نِدعة ) سمنة ونحط الكوسات ( جمع كوسة ) .. التانية جمعها ( كِوس) ، نحطهم في الطاسة مدة صغيرة أوي ونقعد كده بمعلقة كبيرة  ( ندألجهم )  أي ( ندحرجهم ) أي ( نقلبهم ) لمجرد تشم ريحة الدهن و يعني هه تاخد سنة تحمير بسيط .. تلمع يعني شوية … أوعوا  تحمروها  وتخلوها تستوي .

بعدين نجيب لحمة مفرومة معصجة ، وطبعاً مش محتاجة نقول إزي نعصج اللحمة المفرومة ، لكن للمبتدئين هنقول عشان يبقى الشيف تشي  أدى رسالته كاملة في الطبق ده .

نجيب بصلتين وسط متقشرين ومتقطعين صغير أوي ونحطهم في حلة وسط معاهم شويه سمن على زيت ولما البصل يوصل نُص سوا  أو بمعني أدق يدبل ويبدأ لونه يتغير  ، نحط عليه اللحمة المفرومة ونقلب كويس أوي لغاية لما البصل يعشَّق في المفروم ونحط فلفل إسود وملح وتوابل ، ونغطي الحلة ونسيب اللحمة  تستوي ، وكده نبقى حصلنا على العصاج .

نجيب اللحمة المفرومة المعصجة دي ونحشي بيها الكوسة .. لغاية كدة ناس كتير بتقول  إيه يعني الإفتكاسات في ده يا شيف تشي ، التقيل جاي أهو ..  بعد ما نحشي الكوسة كلها  ونبدأ نرصها في الصينية نجيب معلقتين طحينة كبيرة وفي بولة صغيرة نعمل سلطة طحينة وتكون خفيفة شوية مش تقيلة .. بس من غير  مانحط توم عليها (  للناس اللي غاوية تحط توم على الطحينة ) ..وبعدين صحيح ما دام غاوي يحط توم على الطحينة ما يحط ياعم انا مالي .

الفكرة هنا اننا هنستخدم سلطة الطحينة الخفيفة دي كأنها الصوص  أو الصلصة اللي هنسوي فيها الكوسة ، هنجيب الطحينة دي ونحطها على الكوسة في الصينية لغاية لما تقريباً الطحينة تغطي أكتر من تلات أرباع الكوساية ، وندخل الصينية دي في الفرن ومش هتاخد وقت طويل عشان أصلاً كل حاجة مستوية لوحدها عدا الكوسة محتاجة  حاجة بسيطة  كدة (عشان اتلخلخت في الزيت لما دألجناها ) عشان كده هي بالكتير نص  ساعة  ونديها سنة تحمير للوش وهي في الفرن برضه وبعدين نطلع الصينية من الفرن ونقدمها على طول .

 

 

 




التعليق عبر الفيس بوك

تعليق واحد

  • هبه عثمان

    بتاريخ 02/06/2017 - 12:12 م

    هايل …..هايل …..هايل يا شيف يا فنان ، ياللي الأكل عندك مزاج ، وأنا أعتقد أن حضرتك كنت لمحت عنها في برنامج صباح السعادة وإني مفهمتش دي تعمل ازاي، ،،،،مطعم …مطعم لازم تفتح مطعم

اكتب تعليق