.

home


أهلا رمضان

أهلا رمضان :

أهلا رمضان كل سنة وأنتم طيبين ، ورمضان مبارك علينا وعليكم ..

 قعدت النهاردة أخد وأدى مع نفسى ومش عارفة هكلمكم عن أيه الصراحة،  وفجأة كده افتكرت أنى عايزة أتكلم عنى أو عننا كلنا كستات وعائلات فالشهر الكريم، والمواقف اللى بنمر بيها طول الشهر مع أولادنا وأزواجنا وعائلاتنا .

جايز بتحصل قفشات كتر وعصبية أحيانا ، أوتلاكيك وضغوط …. ميضرش برده ، بس ده كله ميمنعش أن كلنا بلا إستثناء بنحب الشهر ده وبنستمتع بيه ومهما يعدى علينا وأحنا فيه مبنحبهوش يخلص أبدا، زى ما يكون شهر رمضان إيد حنينة بتطبطب علينا كلنا فكل حاجة ، وبيصفى نفوسنا وقلوبنا من كل حاجة حصلت طول السنه أو بتحصل فيه ، حاجة كده زى السحر ، بتمحى كل حاجة أول بأول .

أمنيات رمضانية :

كل رمضان بيعدى علينا بتمنى فيه أننا نعيشوا أحسن من اللى قبله ، ونغير فيه من طريقتنا وعاداتنا الحياتية فى الشهر الكريم، واللى كلها بتهدر وقت ومجهود وبتسبب عبء وضغط وخصوصا على ست البيت ، نفسى نفكر بطريقة مختلف السنة دى، من أول عاداتنا الغذائية لغاية طريقتنا مع بعض في التعامل وتنظيم أوقتنا كلنا.

نفسى الزوج يهز طوله ولو مرة من نفسه، ويبدأ يشارك المدام فى إعدادات الشهر المبارك ، ولما يرجع من شغله مثلا ميدخلش ينام  ( أصله صايم يا عينى وتعبان ) ويسيب الغلبانة لايصة فالمطبخ ( أصل صيامها غير صيامه باين !! ) ليه ميدخلش إيده بإيدها فكل حاجة وبكده كل حاجة هتخلص بسرعة والأتنين هيرتاحوا ويلاقوا وقت لأذكارهم ( على رأى المثل  إيد على إيد رحمه) ، ليه ميتبادلوش الأدوار كل واحد يوم بالتبادل ، ليه لو فيه عزومة مبيتهزش للراجل شعره ولا بيشارك بأى حاجة ، حتى من باب أن دى حاجة طارئة، وفى النهاية بينظر ويقيم وينقد كمان .

نفسى نحس بالست شوية عشان تعرف تاخد حقها من العبادة فالشهر ده ومنضيعهوش عليها على حاجات ممكن تتعمل بعدين ،  لو حد ساعدها هتخلص وتقدر تعمل ده ، بتمنى ان كل بيت يحاول يتكاتف ويتعاون خلال الشهر ، عشان الكل يستفيد ويقدر يستمتع بالشهر وروحانياته

الواقع الفعلى :

بس فى الواقع أكتر حد بيتضغط الشهر ده هو الست ( طبعا كل الناس هتقول أنى متحيزة ) هى الحقيقة لا أنا مش بتحيز ده الواقع الفعلى ، بس لو حبينها متحيزة ميضرش بردو ، الست بتبقى داخلة على رمضان بضغوط كتير وكلها ملهاش لازمة ولازم نغيرها ، لأنها جاية من عادات غلط ، يعنى بتبقى شايلة هم العزومات العائلية  وتجهيز وتفريز بعض الأصناف قبل رمضان على طول عشان تسهل عليها طول الشهر ، زى ما يكون رمضان بالنسبة للست مطبخ وأكل وشرب وبس ، وبعد كده طبعا مواعين والذى منه .

التحضير نفسى :

أتمنى رمضان ده كلنا نغير إتجاهاتنا ونعرف أنه شهر عبادة مش أكل وشرب ، أن المفروض التحضير ميكونش أكل وشرب وبس ، يكون تحضير نفسى ومعنوى للتعبد وإستغلال الشهر لأقصى قدر لأخذ ثوابه ، وبالنسبة للأكل بقى يبقى عادى زي أى شهر ويوم فى السنة ، ومفيش مانع من مرة أو أتنين نعمل سفرة بفخمة ، المهم ميبقاش ده أساس الشهر وكل اللى شاغلنا 

أتمنى كل بيوتنا يكون رمضان السنة دى مبارك عليهم ، ويتعاون كل فرد فيه مع التانى فكل تفاصيل البيت مع الست  عشان من حقها كبنى آدم وانسان ومسلم فالمقام الاول انها تعيش روحانياتها بأريحية زى اى حد 

ربنا يتقبل منا جميعا وكل سنة والجميع بخير ، ويا رب رمضان السنه دى يكون بوابة تغيير لكل واحد فينا مع ربه واهل بيته




التعليق عبر الفيس بوك

لا توجد تعليقات

اكتب تعليق