.

home


طاجن البط بالفريك

طاجن البط بالفريك :

طاجن البط بالفريك ، طبق نقدر نقول مبدئياً كده قبل ما ناكله بالهنا والشفا لأنكم هتاكلوا صوابعكم وراااااه ….

حضراتكم محتاجين شوية فريك حلوين يكونوا منقوعين فترة كويسة ومتنقيين كويس( حتى لو الفريك جاي من فرنسا )  لازم نبص فيه بصة .. ده فريك وماينضمنش تكون فيه حصوة كده زلطة كده .. وإشمعنا فرنسا يعني ، حاول تقول كلمة فريك بطريقة اللغة الفرنسية هتلاقي ماشي معاها أوي  !!

طيب عشان الأكلة ماتبوظش مننا والوقت يسرقنا ومانلحقش ، هنبدأ نحط البطة الحلوة تتسلق من الأول كده عشان تكون إستوت على أخر المقال وتلحق تدخل معانا في الطاجن ، وطبعاً نحط البطة في حلة كبيرة عشان تاخد راحتها  في مية فيها بصلة نصين مع شوية حبهان ومستكة وعودين قرفة وحباية قرنفل ( يعني كأنك حاطط البطة عند رجب العطار ) .

نرجع للفريك بعد ما إتنقع ونصفيه كويس نبدأ نفرده في صينية عشان يتهوى ( يعني زي ما بنعمل في الملوخية المتقطفة قبل ما نخرطها ).

بعد ما الفريك تنشف المية بتاعته نجيب بصلتين ونقطعهم كويس ونحطهم في حلة معاهم شوية زيت ونقلبهم كويس وبعد شوية صغيرين نحط الفريك على البصل ونفضل نقلب لغاية لما الفريك والبصل يستوى مع بعض ( يعني إحنا حطينا الفريك على البصل علطول وما إستنناش البصل يستوي الأول ) .

البطة الحلوة المسلوقة نبدأ نقطعها أجزاء ، ومش بس كدة إحنا كمان هنِخلِيها من عضمها وهي مستوية ، عشان يبقى معانا حتت لحم بط فيليه مسلوقة جاهزة ومستوية ونسيب الحتة اللي تطلع من تحت إيدينا زي ما هي بعشوائيتها كده ( مانحاولش نقطع الحتت قد بعض لا مربعات ولا مكعبات ) هي جمالها في عشوائيتها وبعدين إحنا هناكل بط مش كلوب ساندوتش .

دلوقتي عشان نجمّع مع بعض الموقف ، عندنا الفريك مِستوي مع البصل ( كأنه متحمر ) ، وعندنا حتت البط المخليه العشوائية المستوية ،  هنجيب شوية لوز نحمرهم مع شوية زبيب ونحطهم على الفريك ونقلبهم مع بعض وبعدين نحط الخلطة دي كلها  في طاجن كبير ونجيب حتت لحمة البط دي و( ندفنها ) جوة خلطة الفريك دي ( مش عايز ولا حتة بطة تظهر وتبان ) خلي الناس تتفاجئ وهي بتاكل ، وبعدين معلقة سمنة على الوش ، وهوووبا  تجيب شوية شوربة من بتاعة البط ونسقي بيها الطاجن لغاية لما الفريك  ( يلوص ) كده جوة الطاجن ، ونحط الطاجن ساعتها في الفرن ..  يتشرب الفريك الشوربة ، والسمنة عالوش تسيح وتحمر الوش والبط المدفون يروح في داهية أكتر ما هو رايح  ونطلع الطاجن ونحطه على السفرة …و بالهنا والشفا 

 

 




التعليق عبر الفيس بوك

تعليق واحد

  • هبه عثمان

    بتاريخ 06/06/2017 - 12:54 م

    كيف استطاع ابداعك أن يغير مفهوم كلمة (عشوائية ) من جميع السلبيات …..وأصبح يرتبط ب مفهوم جديد ولذيذ ،،،، شابوووه

اكتب تعليق