.

home


بوفيه سلطات باردة

بوفيه سلطات باردة :

تغيير لابد منه في سلسلة مقالات الشيف تشي في رمضان ،  والتنوع مطلوب وبعدين هو فيه أحلى من الكوكتيل ؟!

التومية :

أغلبنا بناكلها في المطاعم بره وخصوصاً عند محلات أبو توم السوري اللي مالين البلد ، إيه المشكلة إننا نجيب بطاطساية في حجم المج كده ونسلقها كويس جداً وبعدين نقشرها  وناخد نصها بس ، معنى كده إننا ممكن نستخدم بطاطساية صغيرة من الأول ، بس حبيت أوضح الحجم بحاجة معروفة ،  ونقوم نهرس البطاطس المسلوقة دي كويس جداً وياريت نضربها في خلاط مع معلقتين لبن ، نيجي بقه نقشر حوالي أربع فصوص توم بلدي ( مش صيني لوسحمتم ) ونفرمهم كويس جداً جداً ونحطهم على البطاطس المهروسة المدهوسة ونقلب كويس ونضيف عليهم برطمان مايونيز ونقلب الخليط ده كله مع بعضه ونحط تاتش ملح صغيرين وكده بقه عندنا أحلى تومية .

بوفيه سلطات باردة متنوع :

 البوفيه ده زى اللى بنشوفه فى محلات البيتزا بالظبط ، سهل أوى نعمله بنفسنا ، له أساس واحد ينفع لكذا نوع سلطة …

نجيب بصلتين متوسطين الحجم ونقشرهم ونقسم البصلاية نصين ونقطعهم على شكل هلال ( جوليان ) بلغة الشيفات ويكون سُمكها مناسب لا تخينة ولارفيعة وبعدين نحطهم في علبة ونغطيهم بمية سخنة بتغلي ونسيبهم كده لمدة ساعة .

نجيب فلفلتين ألوان واحدة حمرا وواحدة صفرا ونقطعهم بنفس الطريقة وبحجم متوسط برضه ونحطهم في علبة تانية ونغطيهم بمية بتغلي لمدة ساعة .

نصفي حلقات البصل من المية  ونصفي حلقات الفلفل الألوان برضه من المية ونُرش في كل علبة منهم  شوية خل يغطي نص الكمية ونُرش عليهم شوية سكر حلويين يجي كده أربع خمس معالق ، نغطي العلبتين كويس ونحطهم في التلاجة لتاني يوم !  يالهوي إحنا لسه هنستنى تاني يوم ؟ معلش خليها عليك المرة دي .

الحمد لله بقينا تاني يوم بسرعة أهو ، بس لو ماكنتش تقاطع كده علطول ، نطلّع العِلب من التلاجة ونصفيهم من صوص الخل الشوجري ونحطهم على بعض ، وكده بقه عندنا حلقات بصل على حلقات فلفل ألوان بصوص خل شوجري ونقسمهم تلات أكوام .

نجيب أول كوم ونقطّع عليه كام صوباع سوسيس حلقات  يادوب شموا مية سخنة ونحط شوية ملح وفلفل إسود ونقلب كويس بقه عندنا سلطة سوسيس شوجري

ونجيب الكوم التاني ونحط عليه شوية  فاصوليا حمرا من العلب اللي بتتباع في الهايبرات ونحط كمان شوية درة صفرا من العلب اللي هتلاقوها في الرف اللي فوق رف الفاصوليا الحمرا ، وكدة بقه عندنا سلطة فاصوليا حمرا بالدرة شوجري .

نجيب الكوم التالت ونحط عليه فاصوليا خضرا متقطعة عُقل ومسلوقة وكانت بايتة برضه في شوية خل بسكر وكده بقه عندنا سلطة فاصوليا خضرا شوجري .

نجيب بقه شوية درة صفرا من باقي العلبة على شوية فاصوليا حمرا من باقي العلبة ( برضك ) ونقلّبهم على بعض ونحُط عليهم شوية مايونيز حلوين كنا مخففينهم بشوية لبن صغيرين ونقلبهم كلهم ونحط شوية ملح وكده بقه عندنا سلطة فاصوليا ودُرة بالمايونيز.

سلطة بتنجان  متبل بالطماطم :

نجيب طماطم وسط ونقطعها إربع ونجيب فلفل رومي ونقطعه حلقات هلالية وبصل كمان نقطعه حلقات هلالية ونحطهم على بعض و نقلب كويس وبراحة عشان ما نبهدلش الطمطام معانا عيب مايصحش …وهنا عندنا أساس لنوعين سلطة تانين ، الأول  نجيب بتنجان نقطعه مكعبات ونقليه ونحط عليه خل وتوم ونجيب  بقه نُص كمية الطماطم والفلفل والبصل ونحط عليهم البتنجان ده ونحط شوية خل وتوم تانين مع حبة ملح ونقلب بهدوء عشان ما نبهدلش البتنجان المرة دي ويتهري مننا كده ، ونسيب كل ده في علبة مقفولة في التلاجة كام ساعة كده وبعدين نطلعها عشان نستخدمها وكده عندنا سلطة بتنجان  متبل بالطماطم .

سلطة طماطم بصوص المسطردة :

النص التاني من كمية الطماطم والفلفل والبصل  نعملهم صوص مخصوص نجيب فيه شوية مسطردة حلويين مع معلقة خل ونعصر عليهم لمونتين مع شوية ملح وفلفل إسود وشوية زيت ونقلب كويس ونحط عليهم خليط الطماطم والفلفل والبصل وكده عندنا سلطة طماطم بصوص المسطردة .

 




التعليق عبر الفيس بوك

لا توجد تعليقات

اكتب تعليق