.

home


رز فرنساوى

رز فرنساوى :

الحقيقة  أنا مش مصدق إنه رز فرنساوى أو إنه  أصلاً شبه أكلة فرنساوي ، يعني الموضوع مش مؤكد عشان كده كنت عايز أكتب العنوان ( رز قال إيه فرنساوي )  بس قلت إني لو شكِكت في الأكلة من أولها ممكن تفقد قيمتها  … ووضعي يهتز …ولولا ثقتي في قُراء الشيف تشي ماكنتش أفصحت عن الحقيقة .

الفكرة إني قعدت سنين أكل الرز ده وهو مكتوب في المنيو إنه رز فرنساوي  وعشان كده قررت أكتب العنوان ( رز فرنساوي )  وفي الآخر اللي كانوا بيكتبولي في المنيو كده هم اللي هيشيلوا الذنب .

معلقتين دقيق نوع نضيف بلاش نسترخص يعني حاجة كده خمس نجوم شغل حلواني ، نقدحهم في شوية سمنة بلدي ونحط سِنة فلفل إسود على ملح  وهنا نيجي لخلاصة خبرات الباشاميل ( إما تسيبي البتاع ده اللي في الطاسة يبرد وبعدين تحطي عليه كوباية لبن بارد وتقلبي كويس ) أو ( تسخني كوباية اللبن وتحطيها على البتاع ده اللي في الطاسة وهو سخن وبرضه تقلبي كويس  ) عشان لو حصل غير كده الباشاميل ( هيكلكع ) .

ملحوظة : معنى كلمة البتاع  هو خليط الدقيق المقدوح بالسمن والفلفل الأسود مع الملح ، ممكن نضيف كوباية كريمة لباني على اللي فات ده كله ونقلب كويس ، عشان نظبط الطعم حبتين تلاتة وناكل حاجة نضيفة وما نستخسرش في نفسنا .

هنعمل شوية رز مفلفلين عادي خاااالص ، والصراحة لو مش عارفة تعملي شوية الرز المفلفلين دول ما ينفعش تقعدي معانا هنا ، وقومي شوفيلك فيديو كليب أحسن .

نسلق شوية بسلة خضرا  طازة لدرجة سوا أكتر شوية من تلات اربع سوا ، يعني يكون فاضلها حشمئلات على السوا .

ملحوظة : معنى الحشمئلات  هو وقت قليل جدا ،  وفي معاجم أخرى هو أي كلمة ماتعرفش تعبر عنها قول علطول حشمئلات !!.

هنعمل شوية لحمة مفرومة معصجة والصراحة صعب برضه حد ميعرفش عصاج اللحمة المفرومة ، ورغم كده ، لو محدش يعرف يقدر يرجع لمقال ( كوسة مقلية محشية طحينية ) على نفس الموقع ( أنت فريدة ) هيلاقي طريقة العصاج .

كده عندنا باشاميل  ورز مفلفل  وبسلة مسلوقة لدرجة الحشمئلات ولحمة مفرومة معصجة ثم نتقمص  روح الحلواني اللي أغلب شغله طبقات فوق بعضها ونجيب طبق بايركس  ولازم بايركس يعني لازم ، هو ينفع طبعاً صينية بس لازم بايركس عشان نستمتع بشكل ألوان الطبقات وإحنا شايفنها من بره البايركس وهو لسه طالع من الفرن والدنيا جواه ( بتبقبق ).

نجيب البايركس ده ونفرد فيه طبقة رز توصل تِلت إرتفاع البايركس وبعدين نحط طبقة رقيقة أوي من الباشاميل  ثم طبقة  لحمة مفرومة وبعدين  نحط طبقة البسلة المسلوقة وكده يبقى فاضل تًلت نحط بقة الطبقة الرئيسية للباشاميل  وأوعي تفنني وتقولي أحط عالوش شوية مودزاريلا  عشان ده فرنساوي مش إيطالي إفهمي بقه .

ضعي هذا البايركس في الفرن وإخرجيه بعد أن يصيبه الإحمرار من أعلى … بالهناء والشفاء .. والسلام عليكم ورحمة الله وبركاته

 




التعليق عبر الفيس بوك

لا توجد تعليقات

اكتب تعليق