.

home


استشارى العلاقات الزوجية مش عيب

 استشارى العلاقات الزوجية مش عيب :                                          

لما يكون فيه اتنين متجوزين من فترة مش طويلة وايضا مش قصيرة ، ودايما يوجهوا نفس المشاكل هيه هيه مش بتتغير على مدار سنين زواجهم، وفى نفس الوقت مفيش نقطة تلاقى فى أى  نقاش ولا بيعرفو يكملوا حوار إلا ولازم يقلب خناقة …..

يبقى هنا لازم تعملوا وقفة مع النفس …

هنا تعرفوا إن فيه مشكلة، وفى حلقة مفقودة فى العلاقة بينكم  ، مانعة  التواصل بينكم بشكل صحيح وصحي فى أى نقاش، وده بيكون على جميع الأصعدة الحياتية  بينكم ، والوقفة دى هاتخليكوا  تفكروا انكم محتاجين مساعدة!!!
ايوة زى ما شوفتوا الكلمة محتاجين مساعدة، وخارجية كمان ، محتاجين تروحوا لمختص فى العلاقات الأسرية أو نفسية أو أى مسمى من المسميات دى لأن فى واقع الأمر وبمنتهى البساطة  استشارى العلاقات الزوجية مش عيب على فكرة !!

احب انوه ان اللى دايما بيقف الوقفة دى بتكون الزوجة ، وحتى لو المبادرة جت من الزوج بيدور على اى حل الا انه  حد من بره يساعدهم ، الزوجة دائما هى صاحبة المبادرة والاقتراح فى الحاجات دى ، وكأن دى حاجة يعتبرها الرجل وصمة عار لو اعترف باحتياجه لزيارة مختص .

الدماغ العتيقة …

غالبا معظم الرجالة يرفضوا الاتجاه ده ، يرفضوا و هما بيكبروا أن اصلا هما عندهم مشكلة ومحتاجين مساعدة متخصصة ، ودائما بيرمى الموضوع على الزوجة ، يعنى بيقولها انا معنديش حاجة لو عايزة روحى انتى ، يعتبر أنه لو استعان بالعلاج النفسي أو الاستشاري فى العلاقات الزوجية انه كده مجنون ، ومنهم يحسها إهانة لرجولته، لأنه من وجهة نظره هو راجل ، وقوى ومش ممكن يبان ضعيف ومهزوز او محتاج مساعدة من حد ، ومنهم يعتبر انها عيب وان ازاى اروح اكشف بيتى واعرى علاقتى بزوجتى على حد غريب سواء ان كان راجل او ست (دماغ عتيقة ), وعشان واحدة تقنع جوزها بحاجة زى كده بتدخل فحرب كبيرة عشان تقنعه بالموضوع ، وطبعا بتبقى واخدة بالها قوى من كلامها ومرتبه ومجهزه الردود ،وبردو غالبا تفشل فى اقناعه ، وينتهى المطاف بيها انها تروح تتعالج لوحدها ، وهو حتى لو مبينش ده او مش معترف بيه فابيعتبرها مريضة وبتتعالج إنما هو ( حاشا وماشا ).

الحل السحرى …

الست بتبقى فاكرة انها لو راحت لوحدها و أقدمت على خطوة انها تروح لاستشاري أن مشاكلها مع جوزها هتتحل وكأن الاستشارى ده يدوس على زرار من اول مرة يحل مشاكلهم المكلكعة من سنين , بس برغم اى حاجة تواجهها بتستمر فى العلاج بتاعها عشان عندها امل ….

امل انها  تحسن حياتها وانها تنجح فكده حتى لو هو ممشيش معاها فى المشوار ده ، وغالبا مشاكلهم مبتتحلش ، لان الزوج اصلا مش معترف بكل الحوار ده وشايف ان ده دلع ستات واى كلام فارغ ، هو أما ساب مراته تعمل ده كان عشان يريح دماغه من زنها عليه ، ويدى لنفسه المبرر أنه يغلطها أما تستمر نفس المشاكل ، عشان يثبت لها صحة وجهة نظره ان الموضوع ده اى كلام.

الكل بيريح دماغه …

اعرف واحد اخيرا جوزها راح معاها لاستشاري ، وبرغم كده متحسنش خالص  لدرجة ان الاستشارى استغرب ان فى ناس نفس حالته بالظبط اتحسنوا كتير وهو مفيش اى تقدم (صفر) ، تسألونى بقى تقولولى وده من ايه يا ترى ؟؟ ليه متحسنش ؟؟ ما الراجل زى الفل اهو ومتعاون وكول وريح المدام ،هاقول لكم أنه اتبع سياسة ترييح الدماغ بس بدل التطنيش انه يقولها روحى لوحدك ، طلع اذكى وراح معاها عشان يريح دماغه ويقنعها بانه عمل اللي عليه اهو ومش مقصر ، يعنى بيروح من غير اقتناع عشان كده متحسنش ، ماهو أول طريق الشفاء انك تقتنع انك عندك مشكلة ومحتاجة تتحل

الجندي الوحيد …

الكلام ده كله بالنسبة لى بيبن حاجة مهمة وهى ان الست دائما وابدا اللى بتحارب عشان تنجح العلاقة ، هى اللى بتقترح وتفكر وتدور على حلول وبدائل ، هى اللى عايز حياتها هى وجوزها تتطلع للأمام وتتحسن وتقوى ، واغلب الرجال فالالا لاند هو من وجه نظره الموقر انه مفيش مشكله طالما بياكلوا وبيشربوا وبيناموا ومحدش عيان يبقى كله ميت فل واربعتاشر .

شغل دماغك شوية …

ايها الزوج اللطيف الحنون الطيب الكيوت اللى مبتعملش اى حاجة خالص ومراتك الشريرة هى سبب المشاكل والحوارات ، وبتتدلع ، معلش يا استاذ حاول تيجى على نفسك وتفكر بره الصندوق شوية  ايه المشكله انك تحاول تجرب ، ما يمكن تظبط ، خليك ايجابى فالعلاقة ، وخذ الخطوة مش عيب على فكرة , واخيرا ربنا يصلح ما بين كل الازواج إن شاء الله .

 




التعليق عبر الفيس بوك

لا توجد تعليقات

اكتب تعليق