.

home


سنة أولى مدرسة

سنة أولى مدرسة .. اه يا حوستى :

“استعنا على الشقا بالله ” جملة بداية السنة الدراسية الى هيا بالنسبالى حاجة جديدة ومبهمة و بخوضها لأول مرة وفى زيى كتير وطبعا كلنا سامعين بلاوى عن الدراسة والمذاكرة الخ ، الخلاصة انه الواحد مش عارف له راس من رجلين وحايس ولايص ومش فاهم .

بداية جديدة :

انا كأم اول مرة بنتى داخلة كجى 1 وبمجرد علم الاصدقاء السابقون فى هذه الدوامة المدرسية وانا بسمع سيل من الكلمات التشجيعية و اللي تفتح النفس من أمثال هو انتى لسه شوفتى حاجة ، ده انتى هتشد فشعرك ، امال لما تبقى اكبر هتعملى ايه ، الصراحة الله يبارك لهم كلامهم أدنى جرعة تفاؤل خلت إقبالي على الدراسة كبير (سامحنى يارب بكدب ) .

سيبوهم يلعبوا ارحموهم :

المهم احب انوه واقول ان انا كشخص طبيعى من معتقداتي ان العيل بتاع الحضانة ده مش لازم اثقل عليه ، ايه يعنى مكتبش الهوم ورك ، هيجرى ايه الدنيا هتتهد ايه يعنى محفظش حرف ولا رقم ، عادى ولا اى حاجة بكرة يحفظ ،

اما بقول كده ادام حد بيقولولى عشان مجربتش وكلامك نظري  انما اما عيالك هيدخلوا المدرسة هتلاقى الأم الحقيقية الأصيلة ظهرت اللى واخدة المركز الاول فى التنشين  بالشباشب والمركز الاول فى الزعيق وقرص الودان عشان الهوم ورك ، يعنى من الاخر احبطونى و شككونى فى نفسى وانى مش هعمل حاجة من اللى بقولها  ومش هكبر دماغي عن العيل بتاع الكى جى واخليه يستمتع بطفولته .

انا بقى دلوقتى فعلا مش عارفة هل انا فعلا هابقي كده ولا هقلب ام اصيلة امنا الغولة ، الموضوع حقيقى صعب ويحتاج تفكير .

فيها حاجة حلوة :

اهم حاجة بقى فى موضوع أول تجربة مدرسة ده ان الواحد برغم كل التجارب والكلام اللذووذ اللى بيتقال ليه الا انى مبسوطه ان بنتى كبرت بقى و داخلة المدرسة ويمكن احساسى ده خلاها هى كمان فرحانة بالمدرسة و حاسة انها حاجة جميلة جدا ، واعتقد انها تجربة جميلة ، متعبة اه جدا جدا بس ممتعة على ما اعتقد  والله اعلم فا يارب متعنا بها

ارحمو جيوبنا يا بشر :

نيجى بقى للنقط اللى مبهدلانا كلنا واللى بنجتمع عليها وهى مصاريف المدارس  وطلباتها و محتوياتها وسلطاتها وبابا غنوجها ، الموضوع زاد وفاض عن الحد والمصاريف زادت بطريقة جنونية  أنهكت اولياء الامور ، يعنى احنا بى نلهث من مصاريف المدارس والسنة لسة مبدأتش اساسا إيشى مقدم وهدوم مدارس صيفى وشتوى والعاب ده غير قائمة الطلبات المغالى فيها بشكل مبالغ لكل طفل وبحاجات معرفش بتستخدم  فى ايه ولو استخدموها ومحتاجين لها  امال يا حضرات المصاريف اللى بتأخّذوها دى تشمل ايه بالظبط لما احنا هنجيب كل حاجة من ورق كانسون و ورق جليتر والوان وحاجات كتير من هذا القبيل (انتو بقى المصاريف بتاخدوها  لأيه ).

بابا فيــــــن :

اكتشفت بقى ان الاب اللى  بى يخوض التجربة المدرسية عموما او لأول مرة دورة وتفكيره غير الام تماما وكل الى بيوجعو مش رأسه من الصداع والمذاكرة لا ابسلوتلى ده جيبه اللى بيوجعه لانه دوره فى معظم البيوت المصرية هو الممول  فقط ولكنه دور مؤثر جدا فحياته ومخليه ماشى يكلم نفسه (امال لو ذاكر لى عيل ).

المهم بقى ان من الكوميديا اللى اكتشفتها وانا بشترى لبنتى اليونيفورم والشنطة وشوية نثريات ان جوزى كان فاهم ان كل علاقته بالمدرسة و مصاريفها هو المقدم اللى بيتدفع والباص والقسط وكان معتقد انه مش هيكع حاجة تانية بس للاسف (طلع نأبك على شونة ) اتدمر نفسيا ومعنويا لما لقى نفسو عمال يشترى فلوازم من قبل ما نبدا بألفين تلاته ولسه بقى اما نبدأ ايشى حفلة وطلبات فوق الطلبات وما خفى كان اعظم .

وطبعا يا حلوين انا صدمته  صدمة عمره ونزلته على أرض الواقع و عرفته الحقيقة من شدة الصدمة بيكلم نفسه و بى يضرب أخماس فى أسداس (عليه العوض ومنه العوض) .

وجه نظر :

خلاصة القول ان كلنا عندنا اولاد وكلنا بنحاول نختار لهم الافضل فكل حاجة على اد مقدرتنا واحيانا كمان بنضغط نفسنا عشان ندخلهم افضل مدرسة متاحة سواء اتفقنا او اختلفنا على التعليم عندنا والجدوى منه بس كلنا بنعمل اللى علينا ، اهم حاجة بالنسبة لى انا و شغلانى و قلتها وبقولها تانى انى هحاول انى مكونش زى باقى الامهات واضغط على اولادى عشان المذاكرة انا اكيد عايزاهم شاطرين بس مش حابة أحمل عليهم أعباء وضغوط من بدرى ،

واخيرا بقى ان المدرسة مرحلة جميلة كلنا مرينا بيها واستمتعنا وبنتمنى ترجع تانى ونصغر وندخلها من جديد لانها اسعد ايام عدت علينا من غير هموم ولا ضغوط ولا مشاكل فياريت نخليها على اولادنا ايام سعيدة بردو و من غير ضغوط ولا مشاكل ، سعيدة للدرجة اللى تخليهم يحنو لها زى ما احنا بنحن لها ونحلم بها .

دمتم سعداء ومستمتعين مع سنة أولى مدرسة 




التعليق عبر الفيس بوك

لا توجد تعليقات

اكتب تعليق